जळगाव : प्रतिनिधी
जिल्ह्यात महिला व बालविकास विभागाच्या माध्यमातून राबविल्या जाणाऱ्या अमृत आहार योजनेच्या अमलबजावणीवर आता मुख्य कार्यकारी अधिकारी मिनल करनवाल यांच्या माध्यमातून थेट नियंत्रण ठेवण्यात येत असून अमृत आहारच्या प्रभावी अमलबजावणीसाठी व्हॉट्सऍप ग्रुप च्या माध्यमातून दररोज देण्यात येणाऱ्या आहाराची सचित्र माहिती घेतली जात आहे.त्यासोबतच दररोज दिल्या जाणाऱ्या आहाराचे जिओ टँगिंग असलेले छायाचित्र देखील घेतले जात आहेत.
जळगाव जिल्ह्यामध्ये महिला व बालविकास विभाग अंतर्गत एकात्मिक बाल विकास सेवा योजना प्रकल्पांतर्गत आदिवासी क्षेत्रात एकूण 4 प्रकल्प कार्यरत आहेत. चोपडा 2 प्रकल्पात एकूण 42 अंगणवाडी केंद्र रावेर 1 प्रकल्पात एकूण 5 अंगणवाडी केंद्र , रावेर 2प्रकल्पात एकूण 44 अंगणवाडी केंद्र आणि यावल प्रकल्पात एकूण 25 अंगणवाडी केंद्र आदिवासी भागात कार्यरत असून सदर प्रकल्पांमध्ये डॉक्टर एपीजे अब्दुल कलाम अमृत आहार योजना ही राबवली जात आहे.
सदर योजनेमध्ये टप्पा एक व टप्पा दोन अशाप्रकारे राबवली जात असून टप्पा एक मध्ये गरोदर व स्तनदा मातांना एक वेळेचा आहार अंगणवाडी केंद्र मध्ये दिला जातो तर टप्पा 2 मध्ये सहा महिने ते सहा वर्ष वयोगटातील बालकांना महिन्यातून 16 दिवस अंगणवाडी केंद्रात अंडी किंवा केळी यांचा पुरवठा केला जात असतो .
जिल्हा परिषदेच्या मुख्य कार्यकारी अधिकारी माननीय मीनल करनवाल यांनी अमृत आहाराच्या प्रभावी अंमलबजावणीसाठी व नियंत्रणासाठी पुढाकार घेतला असून व्हाट्सअप ग्रुप च्या माध्यमातून दररोज आहार देण्याच्या अनुषंगाने आढावा घेतला जात असून पाठपुरावा केला जात आहे. व्हाट्सअपच्या माध्यमातून अंगणवाडी केंद्रांमध्ये गरोदर व स्तनदा मातांचे प्रत्यक्ष जेवण करत असताना चे जिओ टॅग फोटो व सहा महिने ते सहा वर्ष वयोगटातील बालकांचे अंडी किंवा केळी खातानाचे फोटो हे नियमित पणे ग्रुपवर मागवले जातात सदर फोटो चेक केले जात असून त्या अनुषंगाने वेळोवेळी डॉक्टर एपीजे अब्दुल कलाम अमृत आहार योजनेच्या अंमलबजावणीसाठी योग्य त्या सूचना दिल्या जातात.
जळगाव जिल्ह्यातील आदिवासी भागातील कुपोषण कमी करण्यासाठी डॉक्टर एपीजे अब्दुल कलाम अमृत आहार योजना प्रभावीपणे नियंत्रित करून मुख्य कार्यकारी अधिकारी यांनी खऱ्या अर्थाने कुपोषण निर्मूलनासाठी महत्वाचे पाऊल उचलले आहे. सदर उपक्रम राबविण्यात जिल्हा परिषदेचे महिला व बालविकास विभागाचे उपमुख्य कार्यकारी अधिकारी श्री हेमंतराव भदाणे यांच्या माध्यमातून बालविकास प्रकल्प अधिकाऱ्यांना ,पर्यवेक्षिका यांना व अंगणवाडी सेविका यांना सूचना देण्यात येतात. व वेळोवेळी आढावा घेतला जातो.
