जळगाव : प्रतिनिधी
रेल्वे उड्डाणपुलाखाली लावलेली कार काढतांना जुबेर हमीद खाटीक (वय २८, रा. शाहूनगर) या तरुणावर सशस्त्रधारी टोळक्याने हल्ला केला. ही घटना दि. १४ रोजी पिंप्राळा रेल्वेगेटजवळील उड्डाणपुलाखाली घडली. तरुणावर रुग्णालयात उपचार सुरु असून जिल्हापेठ पोलीस तीन दिवसानंतर जखमीचा जबाब नोंदविण्याठी गेले होते. याप्रकरणी रात्री उशिरापर्यंत पोलिसात गुन्हा दाखल करण्यात आलेला नव्हता.
मिळालेल्या माहितीनुसार, शहरातील शाहुनगरात जुबेर हमिद खाटीक (वय २८) हा तरुण वास्तव्यास असून त्याचा कोंबडी व बकरी खरेदीविक्रीचा व्यवसाय आहे. शाहूनगरात रस्त्याच्या काँक्रीटीकरणाचे काम सुरु असल्याने जुबेर याने त्याची कार शिवशक्ती कारबाजार जवळ काही दिवसांपासुन लावून ठेवली होती. सोमवारी रात्री कार आणण्यासाठी गेला असता कार काढत असतांना टोळक्याने त्याच्यासोबत वाद घातला. त्यानंतर टोळक्याने त्याला मारहाण करण्यास सुरुवात केली. मारहाणीत त्याच्यावर धारदार शस्त्रांनी देखील हल्ला चढविला. काही तरुण त्यांच्या दिशेने येत असल्याचे समजताच हल्लेखोर तेथून पसार झाले. त्यानंतर जखमी अवस्थेत तरुणाला जिल्हा रुग्णालयात दाखल केले. अंतर्गत दुखापत झाल्याने कुटूंबीयांनी त्याला रिंगरोडवरील एका खासगी रुग्णालयात हलवले असून त्याच्यावर उपचार सुरु आहेत. गेल्या तीन दिवसांपासुन जखमी बोलण्यच्या स्थीतीत नसल्याने आज जिल्हापेठ पोलिसांनी जखमीचा जबाब नोंदवुन घेतला आहे.
