पारोळा : प्रतिनिधी
जळगाव-धुळे राष्ट्रीय महामार्गावर पारोळ्याजवळील म्हसवे शिवारात पोलिसांनी मोठी कारवाई करत १३ लाख रुपये किंमतीचे अंमली पदार्थांची तस्करी उघडकीस आणली. तालुक्यातील महस्वे शिवारात येथील राजस्थानी ढाब्यावर पोलिसांनी धडक कारवाई करत तब्बल १६४ किलो ६८४ ग्रॅम वजनाचे अफूचे सुकलेले बोंड जप्त केले आहेत. या कारवाईत अंमली पदार्थांसह एक ट्रक, एक कार आणि रोख रक्कम असा एकूण ५० लाखांहून अधिक किमतीचा मुद्देमाल जप्त करण्यात आला आहे.
सविस्तर वृत्त असे कि, राजस्थानी ढाब्यावर पोलिसांचा छापा सोमवारी ८ सप्टेंबर रोजी रात्री उशिराच्या सुमारास ‘श्री रामदेव राजस्थानी ढाबा’ येथे काही इसम अंमली पदार्थांची देवाणघेवाण करत असल्याची गोपनीय माहिती पोलिसांना मिळाली. पोलिसांनी तात्काळ सापळा रचून पारोळा पोलीस निरीक्षक अशोक पवार यांनी आपल्या सहकाऱ्यांसह सहायक पोलीस निरीक्षक योगेश महाजन यांच्या नेतृत्वाखालील पथकाने धाडसी धाड टाकत ही कारवाई केली. या कारवाईत एका आरोपीला रंगेहाथ पकडण्यात आले, तर त्याचे तीन ते चार साथीदार अंधाराचा फायदा घेऊन पळून जाण्यात यशस्वी झाले. असल्याची माहिती मिळाली. या पळून गेलेल्या आरोपींनी आपली दोन वाहने सोडून पळ काढला, त्यापैकी एक हॅरियर कार पोलिसांनी नंतर जप्त केली.
पोलिसांनी केलेल्या या कारवाईत आरोपी शैतानाराम मानाराम विश्नोई (वय ३४, रा. राजस्थान) याला अटक करण्यात आली. त्याच्या ताब्यातून मुद्देमाल जप्त करण्यात आलाः यात १३ लाख १७ हजार रूपये किंमतीचा १६४ किलो ६८४ ग्रॅम वजाचा अफूचे बोंडे, २० लाख रूपये किंमतीची टाटा कंपनीचा ट्रक क्रमांक (आरजे-१९-सीजी-२१११), १० हजाराचा वजन काटा, २ लाख ५५ हजार ४७० रूपये रोख, १५ लाख रुपये किंमतीची टाटा कंपनीची कार असा एकुण ५० लाख ८२ हजार ९४२ रुपयांचा मुद्देमाल जप्त केला आहे. या प्रकरणी पारोळा पोलीस स्टेशनला आरोपी शैतानाराम विश्नोई आणि त्याच्या फरार साथीदारांविरुद्ध एनडीपीएस कायद्यांतर्गत गुन्हा दाखल करण्यात आला आहे. सहायक पोलीस निरीक्षक योगेश महाजन पुढील तपास करीत आहेत.
