नवी दिल्ली : वृत्तसंस्था
देशभरात आज गणेशोत्सवाची धामधूम सुरु असतांना मुंबईत गणेशोत्सवादरम्यान स्फोट घडवून आणण्याची धमकी देणाऱ्या व्यक्तीला शनिवारी उत्तर प्रदेशातील नोएडा येथून अटक करण्यात आली. ५० वर्षीय आरोपीचे नाव अश्विन कुमार सुप्रा आहे. तो बिहारमधील पाटणा येथील रहिवासी आहे आणि गेल्या ५ वर्षांपासून नोएडामध्ये राहत होता आणि ज्योतिष आणि वास्तुशास्त्राचा अभ्यास करत होता.
आरोपीने गुरुवारी रात्री उशिरा व्हॉट्सअॅपवर मुंबई पोलिसांना धमकीचा संदेश पाठवला होता. त्याने लिहिले होते की, ‘लष्कर-ए-जिहादीचे १४ दहशतवादी मुंबईत घुसले आहेत. दहशतवाद्यांनी ३४ वाहनांमध्ये ४०० किलो आरडीएक्स बसवले आहे. ते एक मोठा स्फोट करणार आहेत, ज्यामध्ये एक कोटी लोकांचा मृत्यू होऊ शकतो.’
धमकी मिळताच, मुंबई पोलिसांनी हाय अलर्ट जाहीर केला आणि तपास गुन्हे शाखेकडे सोपवला. दहशतवाद विरोधी पथक (एटीएस) आणि इतर सुरक्षा एजन्सी देखील सतर्क होत्या. तपासानंतर, मुंबई गुन्हे शाखेने नोएडा गाठले आणि सेक्टर-७९ मधील एका सोसायटीमधून आरोपीला अटक केली.
गुन्हे शाखेने आरोपीला नोएडा येथून मुंबईला नेले आहे. पोलिसांनी आरोपीचा फोन आणि सिम कार्ड जप्त केले आहे. याशिवाय त्याच्याकडून ४ सिम कार्ड होल्डर, ६ मेमरी कार्ड होल्डर, एक सिम स्लॉट एक्सटर्नल, दोन डिजिटल कार्ड जप्त करण्यात आले आहेत.
सूत्रांनी दिलेल्या माहितीनुसार, अश्विनने चौकशीदरम्यान मुंबई पोलिसांना सांगितले की, २०२३ मध्ये तो एका फसवणुकीच्या प्रकरणात तीन महिने पाटणा तुरुंगात होता. त्यानंतर फिरोज नावाच्या व्यक्तीने त्याच्याविरुद्ध तक्रार दाखल केली होती.
तेव्हापासून त्याला फिरोजकडून बदला घ्यायचा होता, म्हणून त्याने त्याच्या नावाने मुंबई पोलिसांना संदेश पाठवला, असे अश्विनने सांगितले. तथापि, फिरोज कोण आहे आणि फसवणुकीचे प्रकरण काय आहे हे अद्याप स्पष्ट झालेले नाही.
