अयोध्या : वृत्तसंस्था
देशभरातील अनेक ठिकाणी गुन्हेगारी घटना घडत असतांना नुकतेच उत्तर प्रदेशातील अयोध्या जिल्ह्यात तीन दिवसांपासून बेपत्ता असलेल्या २२ वर्षीय तरुणीचा मृतदेह शनिवारी नग्न अवस्थेत आढळला. मृतदेहाची स्थिती भयावह होती. तरुणीच्या डोळ्यांना इजा करण्यात आली होती आणि शरीरावर अनेक जखमा होत्या. कुटुंबीयांनी अमानुष हत्या झाल्याचा संशय व्यक्त केला आहे. पोलिस अधिकारी आशुतोष तिवारी यांनी सांगितले की, तरुणीच्या बेपत्ता होण्याची तक्रार शुक्रवारी नोंदली.
मिळालेल्या माहितीनुसार, शनिवारी सकाळी तिचा मृतदेह सापडला. मृतदेह पाहून मृतकाची मोठी बहीण आणि गावातील दोन महिला बेशुद्ध झाल्या. तरुणी गुरुवारी रात्री धार्मिक कार्यक्रमाला जात असल्याचे सांगून घरातून बाहेर पडली होती. ती परतली नाही, त्यामुळे कुटुंबीयांनी तिचा शोध घेतला. शुक्रवारी अयोध्या पोलीस ठाण्यात बेपत्ता होण्याची तक्रार दाखल करण्यात आली. कुटुंबीयांनी आरोप केला की, पोलिसांनी शोध घेतला नाही. शनिवारी सकाळी तरुणीच्या भावजीला तिचा मृतदेह गावापासून अर्धा किमी अंतरावर एका छोट्या कालव्यात सापडला.कुटुंबीयांनी सांगितले की, तरुणीच्या डोळ्यांना इजा करण्यात आली होती आणि अनेक हाडे तुटलेली होती.
