सातारा : वृत्तसंस्था
राज्यातील सातारा येथून एक धक्कादायक बातमी समोर आली आहे. साताऱ्याच्या पाटण तालुक्यात इंस्टाग्राम रीलसाठी धोकादायक स्टंट करत असताना चालकाची कार 300 फूट खोल दरीत कोसळली. ही घटना बुधवारी दुपारी 4 वाजता सदावाघापूर परिसरात घडली. चालकाचे नाव साहिल जाधव (20, रा. गोळेश्वर, कराड) असे आहे. तो अपघातात गंभीर जखमी झाला असून त्याच्यावर सध्या उपचार सुरू आहेत.
या घटनेचा एक व्हिडिओ समोर आला आहे. व्हिडिओमध्ये स्टंट करताना गाडीचे नियंत्रण सुटले आणि ती अचानक दरीत पडली. म्हावशी येथील स्थानिक गुराखी मंगेश जाधव आणि किंगमेकर अकादमीच्या विद्यार्थ्यांनी अपघातात गंभीर जखमी झालेल्या साहिल जाधवला वाचवले.
ज्या ठिकाणी ही घटना घडली त्या भागाला ‘टेबल पॉइंट’ म्हणून ओळखले जाते, जे पर्यटकांमध्ये लोकप्रिय आहे, परंतु सुरक्षा रेलिंग नसल्यामुळे हे ठिकाण धोकादायक बनत आहे. अपघाताचा व्हिडिओ व्हायरल झाल्यानंतर, स्थानिकांनी तातडीने सुरक्षा उपाययोजना आणि रेलिंग बसवण्याची मागणी केली आहे.
