पाचोरा : प्रतिनिधी
अपेक्षेपेक्षा कमी गुण मिळाल्यामुळे नैराश्यात असलेल्या भावेश प्रकाश महाजन (१९, रा. एरंडोल) या विद्यार्थ्याने पाचोरा येथे बहिणीच्या घरी आलेला असताना गळफास घेत आत्महत्या केली. ही घटना सोमवारी दुपारच्या सुमारास उघडकीस आली. याप्रकरणी पाचोरा पोलीस ठाण्यात अकस्मात मृत्यूची नोंद करण्यात आली आहे.
सविस्तर वृत्त असे कि, एरंडोल येथील भावेश महाजन या विद्यार्थ्याने बारावीची परीक्षा दिली होती. परीक्षेनंतर तो गेल्या १५ दिवसांपासून पाचोरा येथील राजीव गांधी कॉलनीत राहत असलेल्या बहिणीकडे आला होता. ४ मे रोजी त्याची बहीण व मेव्हणे हे लग्नासाठी पुणे येथे गेले असल्यामुळे भावेश हा घरी एकटाच
होता. सोमवारी सकाळच्या सुमारास भावेश रेल्वे स्थानक परिसरात असलेल्या मेव्हण्यांच्या दुकानावर गेला. दरम्यान, ५ मे रोजी बारावीचा निकाल असल्यामुळे तो दुपारी दुकान बंद करून घरी निघाला. दुपारी एक वाजता ऑनलाईन निकाल जाहीर झाला. यामध्ये भावेशला ४२ टक्के गुण मिळाल्याने तो नैराश्यात गेला. त्यातूनच भावेशने दुपारच्या सुमारास गळफास घेत आपली जीवनयात्रा संपवली. पाचोरा शहरात राहत असलेली भावेशच्या दुसऱ्या बहिणीकडून त्याला जेवणाचा डबा येणार असल्यामुळे त्याची बही बहीण त्याला फोन करत होती. मात्र, भावेश फोनला प्रतिसाद देत नसल्यामुळे त्याच्या मेव्हण्यांनी शेजारी राहणाऱ्या त्याच्या मित्राला घरी जाऊन चौकशी करण्यास सांगितले.
भावेशच्या मेव्हण्याचा मित्र हा त्यांच्या घरी गेला असता, त्याला भावेश हा गळफास घेतलेल्या अवस्थेत दिसून आला. त्याने फोनवरून भावेशच्या मेव्हण्यांना घटनेची माहिती दिली. या घटनेची माहिती पोलिसांना मिळताच पोलीस घटनास्थळी आले. त्यांनी पंचनामा करून मृतदेह पाचोरा ग्रामीण रुग्णालयात दाखल केला. याठिकाणी डॉक्टरांनी तपासणी करत त्याला मयत घोषित केले. या प्रकरणी पाचोरा पोलीस स्टेशनमध्ये आकस्मात मृत्यूची नोंद करण्यात आली आहे.
