भुसावळ : प्रतिनिधी
दीपनगर औष्णिक विद्युत केंद्रात गुरुवारी (दि. २६ जून) रोजी कामाच्या दरम्यान झालेल्या अपघातात यशवंत भास्कर सोनवणे (वय अंदाजे ४०) या कंत्राटी कामगाराचा जागीच मृत्यू झाला. या घटनेमुळे फेकरी गावासह परिसरात शोककळा पसरली असून, प्रशासनाच्या निष्काळजीपणावर प्रश्नचिन्ह उपस्थित होत आहे.
सविस्तर वृत्त असे कि, मागील १२ वर्षांपासून सोनवणे हे कंत्राटदार धर्मेश पटेल यांच्या अधिपत्याखाली दीपनगर औष्णिक विद्युत केंद्रात कार्यरत होते. गुरुवारी दुपारी साडेबारा वाजता ५०० मेगावॅट युनिटमधून १५ कोळशाच्या डब्यांच्या गाड्या २१० मेगावॅट युनिटमध्ये हलविण्याचे काम सुरू होते. यावेळी रेल्वे लोकोमोटिव्हद्वारे रिलीव्ह करताना सोनवणे हे कपलिंग सेटिंगचे काम करत होते. दरम्यान, अचानक पाण्याचा फवारा सुरू झाल्यामुळे चालकाचे लक्ष विचलित झाले व याच वेळी सोनवणे हे लोको आणि डब्यांमध्ये अडकले. यात त्यांचा जागीच मृत्यू झाला. अपघातानंतर त्यांना तातडीने भुसावळ येथील ट्रॉमा सेंटरमध्ये शवविच्छेदनासाठी हलविण्यात आले. सोनवणे यांच्या पश्चात पत्नी, दोन मुली, मुलगा, भाऊ, दोन बहिणी व वडील असा परिवार आहे. या अपघातामुळे त्यांच्या कुटुंबावर दुःखाचा डोंगर कोसळला आहे.
