मालेगाव : वृत्तसंस्था
येथील न्यायालयात आज घडलेल्या घडामोडींनी राजकीय वर्तुळात नव्या चर्चांना तोंड फोडले. मंत्री दादा भुसे यांनी दाखल केलेल्या अब्रुनुकसानीच्या खटल्याच्या सुनावणीसाठी खासदार संजय राऊत स्वतः न्यायालयात हजर राहिले. न्यायालयीन प्रक्रियेनंतर दोन्ही नेत्यांनी एकत्रितपणे माध्यमांसमोर येत वादावर पडदा टाकल्याची घोषणा केली.
संजय राऊत यांनी न्यायालयात तसेच माध्यमांशी बोलताना स्पष्ट शब्दांत दिलगिरी व्यक्त केली. चुकीच्या माहितीच्या आधारे आपण मंत्री दादा भुसे यांच्यावर आरोप केल्याचे त्यांनी मान्य केले. “आम्हा दोघांना न्यायालयाने पाहिले, विषय आता संपला आहे,” असे सांगत त्यांनी मिळालेली माहिती चुकीची ठरल्याने गैरसमज निर्माण झाल्याचे स्पष्ट केले. मालेगावच्या शेतकऱ्यांचीही त्यांनी माफी मागितली.
दादा भुसे यांनीही सकारात्मक भूमिका घेत राऊत यांनी दिलगिरी व्यक्त केल्यानंतर मानहानीचा दावा मागे घेत असल्याची घोषणा केली. “मालेगावच्या शेतकऱ्यांचा आणि नागरिकांचा संभ्रम दूर करणे महत्त्वाचे आहे. विषय वाढवण्यापेक्षा संपवणे योग्य,” असे त्यांनी नमूद केले. यानंतर हा वाद अधिकृतरीत्या समाप्त झाल्याचे स्पष्ट झाले.
वादाची पार्श्वभूमी १७८ कोटी रुपयांच्या कथित शेअर्स घोटाळ्याशी संबंधित होती. संजय राऊत यांनी सामाजिक माध्यमांवर आरोप केले होते. दादा भुसे यांनी ते आरोप फेटाळून लावत संबंधित रक्कम आर्मस्ट्राँग कंपनीकडे हस्तांतरित झाल्याचे स्पष्टीकरण दिले होते. मात्र आरोप मागे घेतले न गेल्याने त्यांनी मानहानीचा खटला दाखल केला होता.
या प्रकरणात अद्वय हिरे यांनी चुकीची माहिती दिल्याचे सूचक विधानही यावेळी करण्यात आले. तथापि, राऊत यांनी आरोप मागे घेत खोटेपणा मान्य केल्याने पुढील कारवाईची गरज उरली नसल्याचे भुसे यांनी सांगितले.
“राजकीय भूमिका वेगळी असली तरी वैयक्तिक संबंध चांगले आहेत. ही महाराष्ट्राची संस्कृती आहे,” असे म्हणत राऊत यांनी वादाला मैत्रीपूर्ण शेवट दिला. एकंदरीत, न्यायालयात सुरू झालेला हा राजकीय संघर्ष अखेर समझोत्याने मिटला असून मालेगावच्या राजकारणातील एक महत्त्वाचा अध्याय संपल्याचे मानले जात आहे.
