जळगाव : प्रतिनिधी
शहरातील सेंट जोसेफ शाळेच्या मेन गेट समोर एका वाढदिवसाच्या पार्टीत गुरुवारी २४ एप्रिल रात्री ९ ते ९.३० वाजेच्या दरम्यान गोळीबाराची धक्कादायक घटना घडली. पूर्ववैमनस्यातून काही तरुणांनी मिळून महेंद्र समाधान सपकाळे (वय २०, रा. प्रबुद्ध नगर, पिंप्राळा) याच्यावर जीवघेणा हल्ला केला. या हल्ल्यात महेंद्रच्या कमरेखाली गोळी लागल्याने त्याला तातडीने सिव्हिल हॉस्पिटलमध्ये दाखल करण्यात आले आहे. याप्रकरणी रामानंद नगर पोलीस ठाण्यात ४ जणांविरोधात गुन्हा दाखल करण्यात आला असून दोन जणांना अटक करण्यात आली तर मुख्य आरोपी हा फरार आहे.
सविस्तर वृत्त असे कि, महेंद्र सपकाळे याचा मित्र भुषण मनोज अहिरे याचा वाढदिवस असल्याने तो त्याचे मित्र अक्षय नारायण राठोड (उर्फ गण्या) आणि सचिन चौधरी यांच्यासोबत गुरूवारी २४ एप्रिल रोजी रात्री ९ ते ९.३० वाजेच्या सुमारास सेंट जोसेफ शाळेच्या गेटसमोर केक कापण्यासाठी गेला होता. त्यावेळी विशाल भिकन कोळी, बाबु बन्शीलाल धोबी (दोन्ही रा. पिंप्राळा) आणि वैभव धिरज कोळी (रा. धरणगाव) आणि भोला भोई रा. पिंप्राळा हे ४ ते ५ इतर साथीदारांसह तिथे आले आणि महेंद्रला शिवीगाळ करण्यास सुरूवात केली. दरम्यान या घटनेबाबत महेंद्र सपकाळे याने दिलेल्या फिर्यादीवरून रामानंद नगर पोलीस ठाण्यात विशाल भिकन कोळी, बाबु बन्शीलाल धोबी (दोन्ही रा. पिंप्राळा) आणि वैभव धिरज कोळी (रा. धरणगाव) आणि भोला भोई रा. पिंप्राळा यांच्या विरोधात गुन्हा दाखल करण्यात आला आहे. गुन्हा दाखल झाल्यानंतर पोलीसांनी दोन जणांना अटक करण्यात आली आहे. तर मुख्य आरोपी विशाल कोळी आणि एक साथीदार हे अद्याप फरार आहे. पुढील तपास पोलीस उपनिरीक्षक प्रदीप बोरूडे हे करीत आहे.
