नवी दिल्ली : वृत्तसंस्था
केदारनाथ धामहून गुप्तकाशीला जाणारे आर्यन एव्हिएशनचे हेलिकॉप्टर गौरीकुंडच्या जंगलात कोसळले आहे. हेलिकॉप्टरमध्ये पायलटसह 7 प्रवासी होते. मिळालेल्या माहितीनुसार, हे हेलिकॉप्टर केदारनाथ धाम येथील प्रवाशांना घेऊन गुप्तकाशीला परतत होते. बचाव पथक घटनास्थळी रवाना झाले आहे.
मिळालेल्या माहितीनुसार, आज सकाळी ०५:१७ वाजता आर्यन कंपनीचे हेलिकॉप्टर केदारनाथ हेलिपॅडवरून गुप्तकाशीसाठी ६ भाविक आणि पायलटसह उड्डाण केले. वाटेत खराब हवामानामुळे दुसऱ्या ठिकाणी हार्ड लँडिंग झाल्यामुळे हेलिकॉप्टर खराब झाल्याचे वृत्त आहे. या अपघातात पायलटसह ७ जणांचा मृत्यू झाला आहे, ज्यांची ओळख राजवीर (पायलट), विक्रम रावत, विनोद, तृष्टी सिंह, राजकुमार, श्रद्धा आणि राशी (वय १० वर्षे) अशी झाली आहे.
या अपघातामागे खराब हवामान हे कारण असल्याचे सांगितले जात आहे. केदारघाटीमध्ये दाट धुके आणि जोरदार वाऱ्यामुळे हेलिकॉप्टर मार्गावरून चुकले. त्यानंतर हेलिकॉप्टरचा संपर्क तुटला आणि ते गौरीकुंडच्या जंगलात कोसळल्याचे वृत्त आहे. घटनेची माहिती मिळताच बचाव पथक घटनास्थळी रवाना झाले. सध्या केदारघाटीमध्ये हवामान खराब आहे.
या घटनेची माहिती देताना उत्तराखंडचे मुख्यमंत्री पुष्कर सिंह धामी म्हणाले की, ‘रुद्रप्रयाग जिल्ह्यात झालेल्या हेलिकॉप्टर अपघाताबद्दल अत्यंत दुःखद बातमी मिळाली आहे. एसडीआरएफ, स्थानिक प्रशासन आणि इतर बचाव पथके मदत आणि बचाव कार्यात गुंतलेली आहेत. मी सर्व प्रवाशांच्या सुरक्षिततेसाठी बाबा केदार यांना प्रार्थना करतो.’
