चाळीसगाव : प्रतिनिधी
जिल्हा पोलीस अधिक्षक मा. डॉ. श्री. महेश्वर रेड्डी, अपर पोलीस अधिक्षक चाळीसगाव मा. श्रीमती कविता नेरकर आणि उपविभागीय पोलीस अधिकारी चाळीसगाव उपविभाग मा. श्री विजयकुमार ठाकुरवाड यांच्या मार्गदर्शनाखाली मेहुणबारे पोलिसांनी मोटरसायकल चोरीचा गुन्हा उघडकीस आणत सराईत चोरास अटक केली आहे.
दिनांक ८ जानेवारी २०२६ रोजी मेहुणबारे पोलीस स्टेशन हद्दीतील दरेगाव व वरखेड गावातून दिवसा दोन मोटरसायकल चोरी झाल्याची घटना घडली होती. याप्रकरणी फिर्यादींच्या तक्रारीवरून मेहुणबारे पोलीस स्टेशन येथे गुन्हा क्रमांक ०७/२०२६ भा.न्या.सं. कलम ३०३(२) अन्वये गुन्हा दाखल करण्यात आला होता.
सदर गुन्ह्याचा तपास करताना प्रभारी अधिकारी सहायक पोलीस निरीक्षक श्री. प्रविण दातरे यांनी अधिकारी व अंमलदारांचे विशेष पथक तयार केले. तांत्रिक तपास व गोपनीय माहितीच्या आधारे पोलिसांनी तीन आरोपी निष्पन्न केले. त्यापैकी दादू संजय सोनवणे (वय १९, रा. दरेगाव, ता. मालेगाव, जि. नाशिक) याला मालेगाव येथून शिताफीने ताब्यात घेण्यात आले.
आरोपीकडून चोरीस गेलेली एक व अन्य एक अशी एकूण दोन मोटरसायकल हस्तगत करण्यात आल्या आहेत. सदर आरोपी हा सराईत मोटरसायकल चोर असून त्याच्या इतर दोन साथीदारांचा शोध सुरू आहे. त्यांच्याकडून आणखी गुन्हे उघडकीस येण्याची शक्यता पोलिसांनी व्यक्त केली आहे.
ही यशस्वी कारवाई प्रभारी अधिकारी श्री. प्रविण अ. दातरे यांच्या नेतृत्वाखाली सहायक पोलीस निरीक्षक, पोलीस उपनिरीक्षक श्री. सुहास आव्हाड, श्री. विकास शिरोळे, पोहेकॉ मोहन सोनवणे, गोकूळ सोनवणे, पोना मिलिंद कुमावत, पोकों विनोद बेलदार, राकेश काळे व प्रशांत खैरे यांनी केली. सदर गुन्ह्याचा पुढील तपास मेहुणबारे पोलीस स्टेशनचे अधिकारी व अंमलदार करीत आहेत.
